Wafdi uu hogaaminayey wasiirka arriamaha gudaha oo gaaray magaalada Baledweyne ee xarunta Gobollka Hiiraan

Codkabulshada Media Network (Baledweyne)Wafdi ka socday dowladda federaalka Soomaaliya oo shalay gaaray magaalada Beledweyne ee xarunta gobolka Hiiraan ayaa kulamo la qaatay maamulka gobolka, kan degmada iyo odayaasha gobolka Hiiraan.

Wafdiga oo uu hogaaminayey wasiirka arrimaha gudaha iyo amniga qaranka Cabdikariim Xuseen Guuleed ayaa waxaa xubnihiisa ka mid ahaa wasiirka kheyraadka dalka Cabdirisaaq Cumar Maxamed iyo saddex xildhibaan oo ka soo jeeda kuwa gobolka Hiiraan, waxaana intii ay joogeen ay kulamo la yeesheen qeybaha kala duwan ee magaalada B/weyne oo ay kala hadleen xoojinta ammaanka.

Wafdigu wuxuu sheegay in ujeeddada socdaalkiisa uu la xiriiro sidii loo adkeyn lahaa ammaanka magaalada Beledweyne, loona qabsan lahaa degmooyinka gobolka Hiiraan ee ay weli joogto Al-Shabaab, wafdigu wuxuu booqday dugsiga tababarka ciidanka oo ay hadda AMISOM ku tababareyso ciidamo boolis ah oo gaaraya 100-askari, halkaas oo uu wasiirka arrimaha gudaha iyo amniga qaranka kula hadlay ciidanka la tababarayo, kuna dhiirrigeliyey inay isku diyaariyaan difaaca dalka iyo sugiddda amniga.
Guddoomiyaha gobolka Hiiraan Cabdifataax Xasan Afrax ayaa sheegay inuu wafdigu ka qeybgalay tacsi loo samaynayay Guddoomiyihii golaha dhaqanka gobolka Hiiraan oo doraad rag hubaysan ay ku toogteen Beledweyne, iyadoo sidoo kale wafdiga uu la socday abaalduuliyaha ciidamada AMISOM oo sheegay in la dardargelin doono amaanka magaalada B/weyne.