Cabdul-Fattah Al-Sisi” Waxaan xoojineynaa Midnimada iyo Madaxbanaanida Soomaaliya”Cabdul-Fattah Al-Sisi” Waxaan xoojineynaa Midnimada iyo Madaxbanaanida Soomaaliya”.

0
115

Madaxweynaha dalka Masar Cabdul-Fattah Al-Sisi ayaa carabka ku adkeeyay Arbacadii shalay inuu wadankiisa si adag u garab taagan yahay midnimada iyo madax banaanida Soomaaliya.

Warka ka soo baxay Al-Sisi ayaa yimid ka dib qad taleefanka uu kula hadlay dhigiisa Soomaaliya Mudane Maxamed C/laahi Farmaajo,sida ay qortay Wakaalada wararka Masar ee loo soo gaabiyo MENA.

Intii lagu guda jiray wadahadalka telefoonka, labada hoggaamiye ayaa ka wada hadlay qaabkii loo xoojin lahaa xiriirka wadajirka ah iyadoo kor loo qaadayo iskaashiga labada dhinac ee la dagaalanka argagixisada iyo xagjirnimada.

Waxay sidoo kale,isla soo hadal qaadeen madaxweynaha Soomaaliya Maxamed C/laahi Farmaajo iyo madaxweynaha Masar Cabdul-Fattah Al-Sisi horumaradii ugu danbeeyay ee Soomaaliya iyo dadaalka xukuumadda ay ku soo celisay amniga iyo xasiloonida si loo fuliyo rabitaanka shacabka Soomaaliyeed loona gaaro horumar.

Dhinaciisa,madaxweyne Farmaajo ayaa ku amaanay Masar doorka taageerida wadankiisa ay ka siiso xasiloonida iyo adkeynta nabad galyada.

Dowladaha Masar iyo Soomaaliya ayaa waxaa ka dhaxeeya xiriir soo jireen ah,kaasoo ku qotoma Arimo badan oo ku saabsan iskaashi dhanka amniga,waxbarashada,ganacsiga iyo dhaqanka.